تاند (سې شنبې، د میزان ۱۸ مه) ملګروملتو نن وویل چې په هرات ولایت کې د شنبې د ورځې د زلزلې په قربانیانو کې لا هم د نژدې ۵۰۰ تنو مړي نه دي موندل شوي.

د ملګروملتو د بشري مرستو د تنظیم ادارې، اوچا ویلي د زلزلې په اصلي مرکز، زنده جان ولسوالۍ کې دوی ۱۳۰۰ تنه مړه او ۱۷۰۰ ټپیان ثبت کړي دي.

د دې ادارې پر اساس، په ځینو سیمو کې درست کلي ویجاړ شوي دي.

ملګري ملتونه اټکل کوي چې د هرات ولایت په ۵ ولسوالیو کې ۱۲ زره ۱۱۰ تنه یا ۱۷۳۰ کورنۍ اغېزمن شوي دي.

د اوچا ویاند ینس لېرک، چې په جینیوا کې خبرې کولې، همداراز وویل چې ډېر احتمال شته چې د مړینو شمېر زیات شي ځکه چې لا هم ارزونې روانې دي.

تراوسه پورې د دې زلزلې د تلفاتو کره معلومات نه شته. د طالبانو د حکومت له پېښو سره د مبارزې وزارت ویلي چې شاوخوا ۴ زره تنه وژل شوي خو ځینې نور بیا وايي چې ۲۵۰۰ تنه وژل شوي دي.

د شنبې د ورځې په یوولس بجې او ۲۰ دقیقې له سختې زلزلې وروسته بیاځلي زلزلې لا هم دوام لري. نن (سې شنبه) هم په زلزله ځپلې سیمه کې، یو بل ټکان، چې شدت یې د ریښتر په حساب ۵ اعشاریه ۱ و، احساس شو چې وضعیت یې لا پسې خراب کړ.

د ملګروملتو د کډوالو د لویې کمیشنرۍ ویندوی ویلیم سپینډر وايي، په داسې حال کې چې زلزلې سخت زیات تاوانونه اړولي او پاتې خلکو روحي ټکان خوړلی، پلټونکي او ژغورونکي ټیمونه هغو خلکو ته، چې هیڅ ورپاتې نه دي، د پناه ځاونو او څښاک اوبو د برابرولو هڅه کوي.