تاند: (یکشنبه، د میزان ۹ مه) په داسې حال کې، چې له پاکستان سره د افغانستان په ختیځه دروازه ( ورخم) کې د سوداګریزو ستونزو د زیاتوالي شکایتونه کیږي، په سویلي دروازه (سپین بولدک) کې بیا د سوداګرۍ د عادي وضعیت او ورڅخه پاکستان ته د کندهار د انارو د ښو صادراتو خبرونه ورکړل شوي.
د کندهار د سوداګرۍ خونې مشر صدیق مومند ویلي، چې تېره اوونۍ له دغه ولایت څخه پاکستان ته د ۷ میلیونه ډالرو په ارزښت ۱۵۰ ټنه انار صادر شوي.
په ورته وخت کې، د کندهار د کرنې او مالدارۍ چارواکو ویلي، چې د تېر کال په پرتله د دغه ولایت د انارو حاصل ۱۰ سلنه زیات شوی.
د کندهار د کرنې، اوبو لګولو او مالدارۍ ریاست ویاند ننګيالی سمون وایي:«سږکال د تېر کال پرتله د انارو په حاصلاتو کې ۱۰ سلنه زیاتوالی راغلی دی. انشاالله سږکال د کندهار انار د تېر کال په څېر مرض نهلري.»