تاند (دوشنبه، د سنبلې ۲۵مه) د افغانستان لپاره د امریکا تر ټولو جګپوړې دیپلوماتې په افغانستان کې د یوې نوې جګړې ملاتړ په کلکه رد کړ، ویې ویل، افغانان له څه باندې څلورو لسیزو وروسته د سولې حق لري.
د افغانستان لپاره دامریکا شارژدافېرې کېرېن ډیکر له ازادۍ راډیو سره په مرکه کې د ملي مقاومت جبهې په شمول د طالبانو د ټولو وسله والو مخالفانو هر ډول ملاتړ رد کړ، ویې ویل؛ افغانان په خپله هم د هرې نوې جګړې د پیلولو مخالف دي.
دې د دې پوښتنې په ځواب کې چې ایا واشنګټن به د طالبانو د مخالفو وسله والو ډلو ملاتړ وکړي او که نه؟ وویل؛«نه، په هیڅ صورت! موږ په افغانستان کې د جګړې د بیا پیلیدو ملاتړ نه کوو. بیخي بس ده. له افغانستان څخه له دننه له ټولو افغانانو دا پیغام اورم چې جګړه بس ده، نوره جګړه نه غواړو.»
دې د خپلو خبرو په دوام کې وویل، پر همدې اساس:«واشنګټن د افغانانو په منځ کې خبرې اترې تشویقوي او ملاتړ یې کوي.»
له افغانستانه د امریکايي پوځیانو له وتلو وروسته د افغانستان کابو ټولو ګاونډیو هیوادونو هم تر دې دمه په افغانستان کې د کومې وسله والې ډلې او د یوې بلې جګړې د پیلېدو له ملاتړه ډډه کړې ده.
کېرېن ډیکر، چې شارژدافېئره ده خو د افغانستان لپاره د امریکا د سفیرې مسوولیت لري، په دې اړه چې په وروستیو کې روسیې د ملي مقاومت جبهې مشر احمد مسعود ته د مسکو د سفر بلنه ورکړه، نو ایا فکر نه کوي چې روسیه افغانستان کې د یوې نوې جګړې ملاتړ کوي، وویل:
«روسان اوس په اوکراین کې مصروف دي، نه پوهېږم چې دا به (د افغانستان د جګړې ملاتړ) رښتیا وي.»
دې په دې اړه یو ځل بیا خپله مخکینۍ خبره تکرار کړه چې افغانان له څه باندې ۴۰ کلنې جګړې ستړي دي او جګړه نه غواړي.