تاند(چهارشنبه، د سنبلې ۲۲مه) پاکستان ادعا کوي چې د ټي ټي پي یو مهم قوماندان بادشاه خان مسید د افغانستان په پکتیکا ولایت کې وژل شوی دی.
د پاکستان راډیو تېره شپه وویل چې بادشاه خان په پکتیکا ولایت کې د ماین په چاودنه کې وژل شوی دی.
د پاکستان راډیو په خبر کې نه دي ویل شوی چې بادشاه خان کله او د پکتیکا ولایت په کومه سیمه کې وژل شوی دی.
د پاکستان نورو رسنیو بیا د امنیتي سرچینو په قول ویلي چې بادشاه خان مسید له خپل یوه بل ملګري سره دوې ورځې وړاندې د پکتیکا په ازبرګي کلي کې د ماین په چاودنه کې له ټپي کېدو وروسته سخت ټپي شوی او وروسته دواړو سا پرې کړې ده.
د پاکستان دولتي راډیو وايي، باشاه خان د ټي ټي پي د مشر مفتي نور ولي ښی لاس و. او پر پاکستاني پوځیانو په ګڼو حملو کې یې لاس درلود.
ټي ټي پي د بادشاه خان د وژل کېدو په اړه تراوسه څه نه دي ویلي او نه هم د افغانستان د طالبانو حکومت په دې باب څه ویلي دي.