تاند (چهارشنبه، د سنبلې ۲۲مه) ملګري ملتونه وايي، د سږ کال په لومړیو شپږ میاشتو کې تر ۷ لکه ډېر افغان کډوال له ایران څخه خپل هیواد ته ستانه شوي دي.
د ملګروملتو د کډوالو لویې کمیشنرۍ په یوه راپور کې ویلي، د روان ۲۰۲۳ په لومړۍ نیمايي کې شاوخوا ۷۱۰۰۰۰ افغان کډوال په خپله خوښه یا په زور له ایران څخه افغانستان ته بېرته تللي دي.
د دې ادارې پر اساس، په بېرته ستنو شویو افغانانو کې ۳۱۰ زره هغه افغانان وو چې په ایران کې یې د هستوګنې رسمي اسناد نه لرل او د ایران له لوري په زور له دغه هیواده ایستل شوي خو کابو ۴۰۰ زره نور په خپله خوښه خپل هیواد ته تللي دي.
د کډوالو د لویې کمیشنرۍ په وینا، له ایران څخه افغانستان ته بېرته ستانه شوي کسان د وړم کال (۲۰۲۲) د ورته مودې پرتله په سلو کې ۱۶ زیات دي.
د ملګروملتو د کډوالو لویه کمیشنري اټکل کوي چې د سږ کال په لومړیو شپږ میاشتو کې (له جنورۍ د جون تر پایه) نژدې ۲۳۳ زره افغانان په قانوني اسنادو ایران ته تللي دي.