تاند (یکشنبه، د سنبلې ۱۹ مه) د طالبانو حکومت د پاکستان له لوری په یو اړخیز ډول د تورخم دروازې پر تړلو نسبتاً توند غبرګون وښود.
د بهرنیو چارو وزارت په دې اړه په اعلامیه کې ویلي چې د تورخم دروازې بندېدا د ښه ګاونډیتوب خلاف عمل دی.
په دې اعلامیه کې چې تېره شپه خپره شوې راغلي، د تورخم دواړو غاړو ته د جنازو ترڅنګ زیات شمېر مسافر بند پاتې دي چې په هیڅ ډول دا کار د توجیه وړ نه دی.
«د تورخم دواړو غاړو ته د جنازو سربېره په زیات شمېر مسافرمېرمنې، سپین ږیري او ماشومان بند پاتې دي چې په هیڅ ډول د توجیه وړ نه دي.»
د طالبانو د حکومت په اعلامیه کې لیکل شوي چې پاکستانی لوری د افغان کرنیزو حاصلاتو او مېوو د رسېدو او صادریدو په وخت په نه توجیه کېدونکو پلمو دروازې تړي چې نه یوازې د دواړو لوریو تجارت ته زیان اړوي، بلکې د دواړو هېوادونو ترمنځ فاصلې زیاتوي.
د طالبانو حکومت دا هم ویلي چې په وروستیو کې د پاکستان حکومت د کراچۍ بندر کې د “حساس لیست” په پلمه په سلګونو کانټیرونو کې د افغان سوداګرو توکي درولي دي.
د بهرنیو چارو وزارت په اعلامیه کې په واګه بندر کې د پاکستان پولیسو پوستې ته نږدې د افغان سوداګرو په انځرو بار د یوې لویې لارۍ د سوځول کېدو یادونه هم شوې او ویل شوي چې دې کار لوی تشویش او بېاعتمادي رامنځ ته کړې.
د دې وزارت د ویاند مرستیال ضیااحمد تکل په دې اړه رسنیو ته په استولي صوتي پیغام کې ویلي:
«په کار ده چې دواړه لوري د سیمې د تجارت، ترانزیت او اقتصاد د بهبود لپاره ستونزو ته د مفاهمې له لارې حللار ولټوي او اجازه ور نه کړي چې سیاسي او نور مسایل اقتصاد، تجارت او د وګړو ازاد تګ راتګ زیانمن کړي.»
په اعلامیه کې د دې یادونه هم شوې چې د تورخم دروازه پاکستاني حکومت وروسته تر دې وتړله چې د تېرې چهارشنبې په ورځ یې عسکرو په طالب ځواکونو د یوې پخوانۍ امنیتي پوستې د ترمیم پر مهال ډزې وکړې.
پاکستان بیا ویلي چې د دواړو خواوو د تفاهم خلاف طالبانو په خپل سر په صفري نقطه کې پوسته جوړوله.
له ډیورنډ هغې خوا ته په لنډي کوتل کې د جمعې په ورځ یو شمېر خلکو لاریون وکړ او د دې لارې د ژر تر ژره پرانستو غوښتنه یې وکړه.