تاند (یکشنبه، د سنبلې ۱۹ مه) د جاپان حکومت د ملګروملتو د یونسیف ادارې په همکارۍ په افغانستان کې ۱۶۵ لومړني ښوونځي جوړوي یا ترمیموي.
جاپان وايي، دا کار د دې لپاره کوي چې په افغانستان کې ۳۳ زره ماشومانو ته د زده کړو خوندي چاپیریال برابر کړي.
د جاپان حکومت د دې هدف لپاره ۲۵ میلیون ډالر ځانګړي کړي چې په هغو به د ۱۶۵ ښوونځیو ودانۍ بیا روغول شي او یا به نوې ودانۍ جوړې شي. همداراز به ښوونځیو ته ټولګي، تشنابونه، او د لاس مینځلو اسانتیاوې برابرې شی.
په افغانستان کې د جاپان سفیر تکاشي اوکادا وویل:«هر ماشوم ښوونځي ته د تګ او په خوندي چاپېریال کې د زده کړو حق لري. جاپان د ښوونځیو د جوړولو او ترمیمولو له لارې د افغان هلکانو او نجونو د زده کړې او ودې ملاتړ کوي.»
د افغانستان نیمايي ښوونځي ودانۍ نه لري او که یې لري هم د ټولو زده کوونکو لپاره ټولګي نه لري. په سلو کې ۵۸ ښوونځي د څښاک د اوبو او تشنابونو په شان ضروري اسانتیاوې نه لري. په ډیرو ښوونځیو کې د ۲۴۹ زده کوونکو لپاره یوازې یو تشناب شته، او په سلو کې ۴۷ ښوونځي شاوخوا دېوال یا چاردېواري نه لري. حال دا چې دا دېوالونه په ځانګړي ډول د نجونو زده کوونکو لپاره خورا مهم دي.
د افغانستان لپاره د ملګروملتو د یونسیف استازي فران ایکویزا وویل:«کله چې ټولګي د ماشومانو لپاره خوندي وي، دوی د زده کړو لپاره انګېزه مومي، ډیر ماشومان ښوونځیو ته خي او حاضري ورکوي. په داسې وخت کې چې افغان ماشومان د زده کړو په برخه کې له ګڼ شمېر خنډونو سره مخامخ دي، د جاپان د حکومت او خلکو ملاتړ په ځانګړي ډول ډیر مهم دی.»
د طالبانو حکومت نجونې له شپږم ټولګي پورته له زده کړو منع کړي او په دې کار یې افغانستان په نړۍ کې په استثنايي هیواد بدل کړی دی.