یوه افغان کډوال ته، چې نژدې ۳ کاله ناحقه د انساني قاچاق په تور بندي و، زرګونه ډالره تاوان ورکړل شو.
۲۵ کلن عاکف رسولي په ۲۰۲۰ م کال یونان ته له رسیدو سره سم ونیول شو او په دې تورن شو چې له ترکیې څخه یې په یوه وړه بیړۍ کې غیرقانوني کډوال د یونان لیسبوس ټاپو ته بیولي دي.
د عاکف رسولي مدافع وکیل وايي چې محکمې منلې چې نوموړی یوه موده ناحق بندي شوی و.
څارنوالان وايي چې عاکف ته ۱۷ زره ډالره غرامت ورکړل شو.
تر دې وړاندې د ۲۰۲۲ په دسمبر کې یو بل افغان پناه غوښتونکی ته، چې په ورته جرم په ۵۰ کاله بند محکوم شوی و، د لیسبوس استیناف محکمې برات ورکړی و.
رسولي له محکمې څخه تر وتلو وروسته وویل:«ما په محبس کې د هغه جرم په خاطر چې نه مې و کړی، زیات کړاو ولید. پیسې په هیڅ صورت هغه وخت بېرته راستنولی نه شی چې زما څخه یې اخیستی دی.»
د یونان د هغه قانون پر اساس چې په ۲۰۱۴ کې یې تصویب کړی، هر کډوال چې د پناه غوښتونکو بیړۍ د یونان خاورې ته وروړي، حتي که دا ثابته هم شي چې دا کار یې د پیسو لپاره نه دی کړی، لږترلږه په ۱۰ کاله بند محکومېدای شي.
رسولي یوازینی کس نه دی چې په دې جرم محکوم شوی دی. په یونان کې د کډوالو د قاچاق په تور زرګونو کسانو ته دوسیې جوړې شوي دي.