تاند: (یکشنبه، د وږي ۱۱ مه ) د طالبانو د دفاع وزیر ملا یعقوب مجاهد نن په کابل کې د ترکیې له سفیر جهاد ارګينای سره لیدلي.
د نوموړي مطبوعاتي دفتر ویلي، چې دا لیدنه د ملا یعقوب په دفتر کې شوې او بېلابېل موضوعات او له هغې ډلې د اړیکو پراختیا پکې بحث شوې ده.
ویل شوي، چې ښاغلي مجاهد له ترکیې څخه له افغانستان سره د بشري او اقتصادي همکاریو له امله مننه کړې ده.
دغه طالب مقام په داسې مهال له ترکیې څخه د نورو بشري مرستو غوښتنه کړې، چې په افغانستان کې ورځ تربلې د اقتصادي او بشري ناورین د شدت خبرونه ورکول کیږي.
د ملګرو ملتونو امنیت شورا پرون په یوه راپور کې وویل، چې د طالبانو د مداخلو او خنډ جوړولو له امله د څه باندې ۵۵ بشري مرسته رسوونکو بنسټونو فعالیتونه په افغانستان کې ځنډیدلي دي.