تاند: (یکشنبه، د وږي ۱۱ مه )  د طالبانو لوی درستیز قاري فصیح الدین فطرت په یوه مرکه کې د پاکستان د پوځي چارواکو هغه خبرداري ته غبرګون وښود، چې ویلي که د افغانستان له خاورې د دوی پر وړاندې خطرونه پای ته ونه رسیږي، د مخنیوي لپاره به یې له زوره کار واخلي.

نوموړي په دغه مرکه کې وویل، چې افغان خاوره د هېچا پر وړاندې خطر نه دی او په دې اړه د پاکستاني چارواکو څرګندونې بې اساسه دي.

د طالبانو لوی درستیز دا هم وویل، چې دوی تر ۱۸۰ زرو پورې د خپلې اردو شمېر رسولی او تر ۲۰۰ زرو تنو یې رسول غواړي.

مخکې د طالبانو د دفاع وزیر ملا یعقوب مجاهد هم پاکستان ته په غبرګون کې ویلي وو، چې د ګواښونو پر ځای دې په خبرو ورسره خپلې اندېښنې حل کړي.

پاکستاني چارواکي بیا- بیا ادعا کوي چې د افغانستان په خاوره کې د دوی د حکومت مخالفې ډلې پناه ځایونه لري، خو د طالبانو چارواکي دا تورونه بې بنسټه بولي.