تاند: (یکشنبه، د وږي ۱۱ مه ) پرطالبانو د افغان خبریالانو د پرله پسې نیونو له امله تر نیوکو وروسته، د افغانستان د خبریالانو مرکز د طالبانو له زندانونو د ۳ خبریالانو د نیولو خبر ورکړی.
دغه مرکز پر خپلې اېکس شبکې لیکلي، چې په پکتیا کې د آریانانیوز خبریال حبیب الله سراب او په کونړ کې ازاد خبریال پرویز څرګند له درې اونیو وروسته او په اروزګان کې د ملي تلويزيون خبريال همدرد له لسو ورځو بند وروسته خوشې شوي دي.
د افغانستان د خبریالانو مرکز د دغو خبریالانو د خوشې کېدو هرکلی کړی او د یوه خبریال او یو بل رسنیز کارکوونکي چې لا هم د طالبانو له خوا بندیان دي، د خوشې کېدو غوښتنه کړې ده.
طالبانو د دغو خبریالانو د خوشې کیدو په اړه څه نه دي ویلي.
د خبریالانو د خوندیتوب نړیوالې کمېټې په یوه تازه راپور کې ویلي، چې د طالبانو له بیا واکمنیدو راهیسې دوی تر ۶۵ پورې کسان د خبریالۍ د کارونو له امله نیولي دي.
طالبان د بیان ازادۍ پر پراخ نقض هم تورن دي، خو دوی خبریالان ګرموي او وایي د بیان ازادۍ ته د شریعت په چوکاټ کې درناوي ته قایل دي.