(یکشنبه، د سنیلې ۵ مه) د ایران د اسلامي شورا د استازو اووه کسیز پلاوي په کابل کې د طالبانو د حکومت له بهرنیو چارو وزیر امیر خان متقي سره وکتل.
د تسنیم خبري اژانس د راپور له مخې، د ایران پارلماني پلاوي له ښاغلي متقي سره د امنیت، له مخدرو موادو سره د مبارزې، د چاقاق د مخنیوي، د پولو د خوندیتوب او سوداګرۍ په اړه خبرې وکړې.
امیرخان متقي پلاوي ته وویل چې د طالبانو له واک ته رسیدو وروسته په افغانستان کې بشپړ امنیت ټینګ شوی او افغان امنیتي ځواکونه توانېدلي چې «داعشي ترهګر» له منځه یوسي او د فغانستان په ټوله خاوره کې دا امنیت نه یوازې د افغانستان بلکې د سیمې او نړۍ د هیوادونو په ګټه هم دی.
د بهرنیوچارو وزیر همداراز وویل:«د افغانستان اسلامي امارت له مخدرو موادو سره د مبارزې په لاره کې کوټلي ګامونه اخیستي او د کوکنارو کښت یې تقریباً صفر ته رسولی دی. د طالبانو په تېره دوره کې د معتادانو شمېر زرګونو ته رسیده، خو د اشغال په ۲۰ کلونو کې میلیونونو ته زیات شو، اسلامي امارت د هغو درملنه پیل کړې او په وروستیو میاشتو کې لسګونه زره معتادان تداوي شوي او دا لړۍ لا هم دوام لري.»
د طالبانو د بهرنیو چارو وزیر همداراز وویل، د سیمې او ګاونډ له هیوادونو سره سوداګري او ترانزیت دوام لري او افغانستان د سیمې د هیوادونو ترمنځ د اتصال په مرکز د بدلېدو په حال کې دی.
متقي افغانستان د ایران د صنایعو لپاره ښه بازار وباله او ویې ویل چې پکار ده افغانستان او ایران د سوداګري او ترانزیت په برخه کې لا زیاتې اسانتیاوې راولي او له دې فرصته ښه ګټه واخلي.
ایران تراوسه پورې د خپل پارلماني پلاوي د سفر د هدف او له طالب چارواکو سره د هغه د خبرو ډېر جزییات نه دي اعلان کړي خو د طالبانو د بهرنیو چارو وزارت ویلي چې د ایران د اسلامي شورا پلاوي له امیرخان متقي سره د قاچاق د مخنیوي، د پولو د ستونزو د ګډ مدیریت، او د غیرقانوني تګ راتګ د مخنیوي په اړه خبرې وکړې.