تاند: (جمعه، د وږي ۳ مه ) د سره صلیب نړیوالې کمېټې په یوه تازه راپور کې پر افغانستان د اقتصادي بندیزونو د بدو پایلو خبرداری ورکړی.
دغې ادارې ویلي، چې سمدستي ۵۵ سلنه افغانان بشري مرستو ته اړ دي، چې د اقتصادي بندیزونو دوام یې شمېر زیاتولی شي.
سرچینې په مشخص ډول نه دي ویلي، چې هدف یې له اقتصادي بندیزونو کوم بندیزونه دي.
دم ګړۍ، د طالبانو رژیم د نړیوالو لخوا په رسمیت نه پېژندل کیږي، چې له امله یې افغانستان سره رسمي تعاملات او اقتصادي همکارۍ هم خورا کمې شوې دي.
د دې ترڅنګ، امریکا متحده ایالاتو د افغانستان بانک نږدې ۱۰ میلیارده ډالره بانکي زېرمه کنګل کړې، چې د طالبانو رژیم یې د اقتصادي وضعیت د خرابیدو یو اصلي دلیل بولي.