تاند: (دوشنبه، د زمري ۳۰ مه ) په کابل کې د ایران د سفارت سرپرست او د افغانستان لپاره د دغه هېواد د ولسمشر ځانګړی استازی کاظمي قمي وایي، چې افغانستان ته ورغلو متخصصینو یې د هلمند سېند د اوبو کمیدل تایید کړي.
نوموړي ویلي: متخصصینو مو تایید کړې، چې د هلمند سېند اوبه د نورمال وضعیت هومره نه دي.
د طالبانو رژیم لا له وړاندې ایران ته دا خبره کړې وه، خو د دغه هېواد چارواکو نه وه منلې.
د ایران او طالبانو ترمنځ په دې اړه له څه وخت راهیسې ناندرۍ وې.
ایراني چارواکو ویل، چې افغانستان نه د خپلو اوبو حق غواړي، خو طالب چارواکو ویل، چې په افغانستان کې د هلمند سېند اوبه کمې دي او خپله افغانانو ته هم بسنه نه کوي.
د طالبانو د ریاست الوزرا سیاسي مرستیال مولوي عبدالکبیر څو ورځې مخکې وویل، چې د تفاهم له لارې ایران سره د اوبو په سر د جنجال حلیدل د دوی یوه لویه لاسته راوړنه ده.