تاند: (دوشنبه، د زمري ۳۰ مه ) د طالبانو دفاع وزارت ویلي، چې امریکایي چارواکي د افغانستان دوه ګاونډي هېوادونه له افغانستانه د ور وړل شویو هلیکوپټرو بیرته ستنولو ته نه پریږدي.
د دغه وزارت د پالېسۍ مرستیال محمد قاسم فرسد ویلي، چې په تاجیکستان او ازبکستان کې د جمهوري نظام د سقوط پر مهال له افغانستانه تر ۶۰ پورې هلیکوپټرې ودرول شوي.
دغه هلیکوپټرې افغان پیلوټانو له دې امله وړې وې، چې طالبانو ته په لاس ور نه شي.
د طالبانو دفاع وزیر ملا یعقوب مجاهد په دې اړه د تاجیکستان او ازبکستان حکومتونو ته خبرداری ورکړی و، چې یادې هلیکوپټرې باید ور ستنې کړي.
اوس طالب چارواکو ویلي، چې د دغو هلیکوپټرو د ستنیدو لوی خنډ امریکا متحده ایالات دي.
امریکایي چارواکو او د افغانستان یادو ګاونډیو هېوادونو په دې اړه څه نه دي ویلي.