تاند (دوشنبه، د اسد ۳۰ مه) د طالبانو د حکومت د سکرو د صادراتو ګمرکي محصول په هر ټن کې ۱۵ ډالره کم کړی دی.
د طالبانو د حکومت د کانونو او پیترولیم وزارت پرون (یکشنبه) په یوه خبرپاڼه کې ویلي چې د دوی د حکومت د مشرتابه د حکم پر اساس د هر ټن سکرو ګمرکي محصول له ۴۵ ډالرو ۳۰ ډالرو ته کښته کېږي.
دغه وزارت همداراز وايي چې د هر ټن سکرو د پلور بیه یې هم له دوه نیم زره افغانیو ۲۲۰۰ ته راټیټه کړې ده.
د کانونو او پیترولیم وزارت نه دي ویلي چې ولې یې د صادراتي سکرو ګمرکي محصول کم کړی دی.
د افغانستان سکاره پاکستان ته صادریږي او له دې وړاندې هم د طالبانو حکومت د سکرو ګمرکي محصول کم کړی و.
د سږ (۱۴۰۲) کال په لومړیو څلور میاشتو کې د ۵ میلیون ډالرو په ارزښت ۴۹۷۰۰۰ ټنه سکاره پاکستان ته صادر شوي دي.