تاند: (یکشنبه، د زمري ۲۹ مه ) طالبانو د کابل په پغمان ولسوالۍ کې د څلورو هغو کسانو د وژلو خبر ورکړی، چې دوی انسان تښتونکي بللي.
د طالبانو کورنیو چارو وزارت ویلي، په دې عملیاتو کې، چې د پُشت بادام په سیمه کې وشول، د محمدامین په نوم تښتول شوی کس خوشې شوی.
سرچینه زیاتوي: نوموړی درې ورځې وړاندې یرغمل شوی و.
خپلواکو سرچینو په دې اړه څه نه دي ویلي.
سره له دې، چې په وروستیو کې د انسان تښتونو او نورو جنایي پېښو د زیاتیدو خبرونه او پر ضد یې د طالبانو د اقداماتو خبرونه ورکول کیږي؛ خو د طالبانو منتقدان دوی ځينې وخت تورنوي چې خپل مخالفان په مختلفو نومونو وژني.
طالبان په دې اړه ادعاوې نه تاییدوي.