تاند: (شنبه، د زمري ۲۸ مه ) د ترکیې پولیسو ویلي، چې په یوه لارۍ کې یې پټ شوي ۴۰ ناقانونه افغان کډوال نیولي.
سرچینې ویلي، چې دغه کډوال به بیرته خپل هېواد ته ستانه کړي.
په وروستیو کې ترکیې د ناقانونه افغان کډوالو نیول او هېواد ته ستنول چټک کړي.
ویل کیږي، چې د روان میلادي کال له پيله تراوسه تر څلور زرو پورې ناقانونه افغان کډوال له ترکیې څخه افغانستان ته استول شوي.
افغان کډوالو دوی سره د ترکیې د پولیسو د ډېر ناوړه چلند ادعاوې هم کړې دي.
د طالبانو د ریاست الوزرا اقتصادي مرستیال ملا عبدالغني برادر څه موده مخکې ترکیې ته د سفر پر مهال، د دغه هېواد له چارواکو غوښتي وو، چې افغان کډوالو سره ښه چلند وکړي.