تاند (پنجشنبه، د اسد ۱۲ مه) په استانې کې د افغانستان او قزاقستان سوداګرو او پانګوالو په خپل منځ کې د نژدې ۱۹۱ میلیون ډالرو په ارزښت قراردادونه لاسلیک کړل.
د انټرفکس خبري اژانس د راپور له مخې، د قزاقستان د سوداګرۍ وزارت نن (پنجشنبه) په یوه خبرپاڼه کې وویل چې دا قراردادونه نن په استانې کې د افغانستان او قزاقستان ترمنځ د درې ورځنۍ اقتصادي غونډې په لومړۍ ورځ لاسلیک شول.
د قزاقستان د بهرنیو چارو وزارت وایي، ۱۵۰ تنه افغان چارواکي او سوداګر دې غونډې ته بلل شوي دي.
د دغه وزارت پر اساس، په دغو کسانو کې هیڅ داسې کس نشته چې د نړیوالو له خوا دې د بندیزونو په لست کې شامل وي.
د طالبانو د صنعت او سوداګرۍ وزارت د سرپرست وزیر نورالدین عزیزي په مشرۍ پلاوی د افغانستان او قزاقستان د سوداګري اتصال غونډې ته تللی دی.
د دغه وزارت په وینا، د غونډې مقدماتي مراسم پرون چهارشنبه پيل شوي دي.