تاند (جمعه، د اسد ۱۳ مه) د اسلامي دولت په نوم ترهګرې ډلې، چې ځینې یې داعش او ځینې یې خوارج بولي د پنجشنبې په ورځ د خپل نوي مشر نوم اعلان کړ.
دې ډلې خپل نوی مشر وروسته له دې اعلان کړ چې د ترکیې ولسمشر رجب طیب اردوغان څو میاشتې پخوا وویل چې تُرک ځواکونو د داعش مشر وژلی دی.
د اسلامي دولت ډلې ویندوی په خپل ټیلګرام (خواله رسنۍ) کې ویلي چې ابو حفص الاهاشمي القریشي یې نوی مشر ټاکل شوی دی.
د داعش ویندوی نه دي ویلي چې کله یې پخوانی مشر ووژل شو.
د الجزیرې تلویزیون د یوه راپور له مخې، د داعش مخکینی مشر د سوریې په شمال لوېدیځ کې له خپلې سیالې ډلې، حیات طاهرالشام سره په مخامخ نښته کې ووژل شو.
له بلې خوا د ترکیې ولسمشر رجب طیب اردوغان په اپریل میاشت کې ادعا وکړه چې د ترکیې استخباراتي ځواکونو د اسلامي دولت پخوانی مشر له اوږده تعقیبه وروسته وژلی دی.
داعش ډله اوس تر منځني ختیځ په افغانستان او پاکستان کې ډیره فعاله ده. دې ډلې د یکشنبې په ورځ د خیبر پښتونخوا په باجوړ کې د خونړۍ حملې مسوولیت په غاړه واخیست.
په دې برید کې لږترلږه ۶۴ تنه ووژل شول.