تاند (د اسد ۱۲ مه) د پاکستان د بهرنیو چارو وزارت وايي، تېره میاشت د بلوچستان ایالت د ژوب پر پوځي فرقې (چاوڼۍ) حمله افغان ترهګرو کړې وه.
د جولای په ۱۲ مه څو وسله والو د ژوب په فرقه برید وکړ او لږترلږه ۱۳ تنه یې ووژل.
پاکستاني چارواکو په پیل کې هم ادعا کړې وه چې حمله کوونکي افغانان وو خو د پاکستان د بهرنیو چارو وزارت ویاندې ممتاز بلوچ پرون (چهارشنبې) وویل په دې برید کې ۵ حمله کوونکو برخه لرله چې ۳ یې افغانان وو.
د پاکستان د بهرنیو چارو وزارت ویاندې وویل چې دا برید په کلکه غندي او په دې اندېښنه ښيي چې د افغانستان له خاورې پر پاکستان د بریدونو لپاره کار اخیستل کېږي.
پرون د پاکستان صدراعظم شهباز شریف د باجوړ د یکشنبې د ورځې د برید پړه هم پر افغانانو واچوله.
طالبانو مخکې د پاکستان پر ضد د افغانستان د خاورې د کارول کېدو په اړه ادعاوې رد کړي خو د پاکستان د تازه ادعاوو په اړه یې تراوسه څه نه دي ویلي.
د خیبر پښتونخوا د باجوړ د تېرې یکشنبې د خونړي برید د قربانیانو شمېر ۶۳ ته زیات شوی دی.
اسوشیتید پریس خبري اژانس په روغتونونو کې د یو شمېر ټپيانو له مړینې وروسته پرون چهارشنبه دا شمېرې خپرې کړي دي.
طالبه ک… ټینګوه!