تاند: (پنجشنبه، د زمري ۱۲ مه) د طالبانو د ټولګټو وزارت وایي، د سالنګونو لویې لارې د ۸۰ کیلومتره سړک د اساسي ترمیم او بیارغونې کار یې پيل کړی دی.
د وزارت د خبرپاڼې له مخې، د یادې پروژې د کار د ښه تطبیق په موخه؛ سر له شنبې ورځې څخه؛ دغه لویه لاره د ورځې لخوا د هر ډول ترافیکي وسایطو د تګ راتګ پرمخ تړل کېږي.
سرچینه زیاتوي: د شپې لخوا په نوبت سره یوه شپه له شمال څخه جنوب لوري ته او بله شپه له جنوب څخه شمال لوري ته د تګ اجازه ورکول کېږي.
ټولګټو وزارت له خلکو غوښي، چې د راتلونکې جمعې ورځې تر پایه پورې اړونده اړتیاوې پوره او د حوصله مندۍ یې له تخنیکي پرسونل سره همکاري وکړي.
سالنګ لاره، د افغانستان شمال له مرکزي سیمو سره نښلوي.
یو شمېر خلکو د دې لارې د جوړیدو د پيل هرکلی کړی دی.
دا لار په تیرو کلونو کې په ځلونو ترمیم شوې خو ژر ورانه شوې، خلک تمه لري چې دا ځل به اساسي جوړه شي.
د سالنګ لویه لار او تونل
د سالنګ تونل د سمندر له سطحې نه 3950 متره لوړ او د افغانستان دهندوکش واورینو غرونو په مرکزي برخه کې موقعیت لري . د دې تونل اوږدوالی دوه کیلومتره او اووسوه متره ، سور یې 6 متره او د تونل لوړوالی پنځه متره دی .
د دې پروژې د جوړولو کار د ارواښاد اعلیحضرت محمد ظاهر شاه د پاچاهي او د شهید سردار محمد داود خان د صدارت په وخت کې د پخواني شوروي په مرسته په 1337 کې شروع او په 1343 پای ته ورسېده.
د دې سترې پروژې کار د ډګروال محمدنسیم خان په مشرۍ د افغانستان د وخت ملي اردو په واسطه سرته رسېدلی ، چې 636 میلیونه امریکایی دالره مصرف ورباندې راغلی دی. د دې مهمې پروژې د کار په سرته رسولو سره د افغانستان د شمال او جنوب ترمنځ لاره 110 کیلومتره لنډه شوېده . د تونل له جوړېدو مخکې د هېواد شمال او جنوب ترمنځ تګ راتګ ، سوداګري او انتقالات د هندوکش د غرونو ترمنځ سرته رسېده .