تاند: ( دوشنبه، د زمري ۹ مه ) د طالبانو رژیم د یوه امریکایي بنسټ هغه کمپاین ته توند غبرګون ښودلی، چې له هېواده د شاوخوا یو نیم زر افغان څارنوالانو د ژغورلو او هېواد نه وېستو په نوم یې پيل کړی.

د طالبانو ویاند ذبیح الله مجاهد په دې اړه د امریکايي او نړیوالو بنسټونو اندېښنې “بې اساسه” بللې دي.

 مجاهد په یوه ټویټ کې دا کار د “افغانستان څخه د کدرونو د ایستلو او د انسان قاچاق ته د لار هوارولو” یوه هڅه بللې ده.

په وروستیو کې په امریکا کې د انتقالي عدالت او سولې غیر انتفاعي موسسې د هغو ۱۵۰۰ افغان څارنوالانو او د هغوی د کورنیو د وېستو غوښتنه کړې چې په دې هېواد او ګاونډیو هېوادونو کې له جدي ګواښونو سره مخامخ دي.

دغه بنسټ په یوه خبرپاڼه کې ویلي، چې طالبانو د افغانستان له نیولو راهیسې ۲۶ څارنوالان او د هغوی د کورنیو غړي شکنجه کړي او یا یې وژلي دي.

د طالبانو ویاند په یوه ټوېټ کې لیکلي: “له بده مرغه ځینې متعصبې بهرنۍ ادارې د بشري حقونو، سولې او عدالت تر نامه لاندې د افغانستان په اړه ناسم راپورونه خپروي او په دې کار کوي چې خلک وتښتي او له هېواده ووځي.”

هغه “په افغانانو غږ کوي چې د دغو مشکوکو بنسټونو په دوکه کې نه راځي او خپل هیواد نه پریږدي”.

شاوخوا ۶۰۰۰ افغان څارنوالانو چې په پرځیدلي جمهوري نظام کې یې کار کاوه د طالبانو د حکومت پر مهال د خپلو دندو د له لاسه ورکولو او خوندیتوب په اړه اندېښنه ښودلې ده.

څو میاشتې مخکې، د طالبانو عمومي مشر ملا هبت الله اخندزاده په یوه فرمان کې د لوی څارنوالۍ اداره لغوه او پرځای یې د خپلو فرمانونو د عملي کیدو د څارنې اداره جوړه کړه.

په یاده اداره او نور عدلي او قضایي سکتور کې طالبانو تر ډېره دوی ته ژمن کسان ګومارلي، چې منفي غبرګونونو سره مخ شوي دي.