تاند: ( دوشنبه، د زمري ۹ مه ) د طالبانو د بهرنیو چارو وزارت سیاسي مرستیال شېرمحمد عباس ستانکزي د افغانستان لپاره د ترکیې سفیر جهاد ارګینای سره په کتنه کې د افغان کډوالو او راستنېدونکو د ستونزو په اړه خبرې کړي.
نوموړي ویلي: په افغانستان کې د ۴ لسیزو جګړو له امله زیات شمېر افغانان ګاونډیو، سیمې او اروپایی هېوادونو ته کډوال شوي دي.
ستانکزي د افغان کډوالو له کوربه هېوادونو مننه کړې او ترې غوښتي، چې دغو کډوالو سره د نړیوالو قوانینو مطابق چلند وکړي.
د طالبانو په خبرپاڼه کې راغلي:په پای کې دواړو لوریو هوکړه وکړه، چې په نږدې راتلونکي کې به د افغان کډوالو او راستنېدونکو د ستونزو د حل لپاره عملي ګامونه پورته کړي.
پرون د طالبانو د کډوالو چارو وزارت مرستیال هم د ترکیې سفیر سره لیدلي او د افغان کډوالو په وېستو یې اعتراض کړی.
په وروستیو کې ترکیې له خپلې خاورې د افغان کډوالو وېستل زیات کړي، چې نیوکو سره مخ شوی.