تاند- په سمندرونو کې څو داسې مرموز او ژور ځایونه شته چې خطرناک ګڼل کېږي او په ځلونو بیړۍ او حتي له پاسه ورباندې تیریدونکې الوتکې ترۍ تمې شوي دي.
ساینسپوهان د دې علت په دې سیمه کې د جاذبې قوه بولي.
یو له دغو ځایونو چې ډیر مشهور دی د امریکا فلوریدا ته نژدې په اطلس سمندر کې د برمودا مثلت دی.
د دې سیمې مساحت د یو میلیون او ۳ لکه کیلومتره تر ۳ میلیونه او ۹۰۰ زره کیلومتر مربع پورې اټکلیږي.
د برمودا مثلث په اړه ډیر څه ویل شوي او خپاره شوي خو تازه ساینسپوهانو د هند په سمندر کې یو ژور ځای کشف کړی خو د دې ژور ځای په اړه ویل شوي چې د جاذبې قوه یې تر نورو ځایونو کمه ده.
تر ډیرو کلونو پورې ساینسپوهان نه پوهېدل چې په هند سمندر کې دا سیمه، چې نژدې ۳ میلیون کیلومتره پراخه ده، ولې تر شاوخوا سیمې ډېره ژوره ده.
دا سیمه تر نورو سمندرونو ۱۰۶ متره ژوره ده.
ساینسپوهان وايي چې د دې سیمې د جاذبې قوه کمه ده او له همدې کبله ژوره ده.
ساینسپوهانو د دې سیمې د لوړو ژورو نقشه اخیستې او اوس د هند د ساینس انستیتیوت دوو څېړونکو د دې ژور ځای په اړه څېړنه کړې ده.
د دوی په څېړنه په جیوفزیکل ریسرچ لیټرز مجله کې خپره شوې ده.