تاند: ( پنجشنبه، د زمري ۵ مه ) د طالبانو رژیم ویلي، چې د افغانستان د علومو اکاډمۍ شاوخوا ۴۰۰ کارکوونکي یې د دیني زده کړو په برخه کې له یو کلنې روزنې فارغ کړي.
د طالبانو د لوړو زده کړو وزارت معین مفتي محمد الطاهر احمدي، په دې اړه جوړه شوې غونډه کې ویلي، چې له داسې روزنیزو دورو موخه « د عقایدو تصحیح او اصلاح کول» دي.
د افغانستان علومو اکاډمي، چې د هېواد په سطحه د علمي څېړنو تر ټولو معتبره رسمي مرجع ده؛ د پرزول شوي جمهوري نظام پر مهال د اسلامي څېړنو په نوم د معاونیت تر سطحې تشکیلات او ځانګړې برخې لرلې، چې اسلامي څېړونکو څېړنې پکې کولې.
د افغانستان په تعلیمي نصاب کې هم له لومړي ټولګي دیني زده کړې شاملې وې.
د طالبانو منتقدان دوی تورنوي، چې ټولو غیر طالب افغانانو، حتا په اسلامي او نورو لوړو زده کړو سمبالو خلکو سره د غیر مسلمانانو په شان چلند کوي او په داسې پروګرامونو د حقارت احساس ورکوي.