تاند- ټویټر خپله لوګو بدله کړه او نور د دې ټولنیزې شبکې د مرغۍ پر ځای یوه چلیپا یا د انګلیسي ایکس توری لیدل کېږي.
په نوې لوګو کې، چې تور رنګ لري، د چلیپا نښه یا ایکس توری په سپین رنګ ښکاري.
د ټویټر عملیاتي ريیسې لیندا یاکارینو د نوې لوګو د ښکارولو په اړه پرون (دوشنبه) په یوه ټویټ کې ولیکل، «ایکس دلته دی راشئ ورڅخه کار اخیستل پیل کړئ.»
تر دې وړاندې د ټویټر خاوند ایلن مسک ویلي و چې د ټویټر لوګو، چې یو مرغه دی، لېرې کوي.
ښاغلي مسک تېر کال ټویټر له یوې جنجالي معاملې وروسته په ۴۴ میلیارد ډالره واخیست.
ایلن مسک د یکشنبې په ورځ په یوه ټویټ کې کښلي و:«ژر به د ټویټر نوې نخښه ووینئ او له مرغانو سره به خدای پاماني وکړو.»
ده د ټویټر په سپېس کې هم د وینا په مهال ویلي و چې دا بدلون یې باید ډېر پخوا راوستی وای.