تاند: ( دوشنبه، د زمري دویمه) د ایران د پارلمان یو شمېر غړو د دغه هېواد رسنیو ته په ضمني ډول ویلي، چې حکومت یې د افغانستان پر واکمن رژيم د هلمند سېند د اوبو په موضوع کې د افغان کډوالو له اړخه فشار اچول غواړي.
په کابل کې د ایران پخواني سفیر او د دغه هېواد د پارلمان غړي فدا حسین مالکي او د پارلمان د کرنې کمېسیون مشر علي رضا نظري ویلي، چې په دې برخه کې ځينې ګامونه په اخېستل کېدو دي.
په دې لړ کې، د ایران د ځينو ښارونو یادونه شوې، چې د ایران حکومت پکې د افغان کډوالو استوګنه منع ګرځوي.
ایراني وکیلانو ویلي، چې طالبانو سره له غیر دیپلوماتیکو لارو باید د هلمند سېند د اوبو په موضوع کې مخته لاړ شي.
د طالبانو حکومت تراوسه په دې اړه څه نه دي ویلي.
ایران د جمهوري نظام پر مهال هم پر افغانستان د فشار اچول لپاره، په خپله خاوره کې مېشت افغان کډوال ځورول، چې له دې امله د کډوالو نړیوالو بنسټونو له نیوکو سره مخ و.