تاند: ( پنجشنبه، د سرطان ۲۹ مه) د افغانستان بانک لپاره د طالبانو چارواکي وایي، د ملګرو ملتونو سازمان د سرمنشي ځانګړې استازې روزا اوتونبایوا، د افغانستان بانک له عمومي طالب رئيس هدایت الله بدري سره لیدلي.
سرچینه زیاتوي، په دې لیدنه کې مېرمن روزا وویل: د بېلابېلو اقتصادي ننګونو او ستونزو سره سره د افغانستان بانکي سکتور په غوره توګه مدیریت شوی دی او د افغانستان اقتصادي فعالیتونه د ستاینې وړ دي.
د افغانستان بانک د اعلامیې له مخې، په دې کتنه کې په افغانستان کې د کوچنیو تشبثاتو اسلامي مالي تمویل د ودې په برخه کې پر ګډو همکاریو، پر بانکي سکتور د بندیزونو لري کولو او د بانکي سکتور د وضعیت او یو شمېر اړوندو موضوعاتو په اړه هر اړخیزې خبرې وشوې.
د افغانستان بانک طالب رئیس په دغه کتنه کې وویل: د افغانستان اقتصاد یو څه د کرونا وبا له کبله او یو څه د افغانستان بانکوالۍ سکتور باندې د وضع شوو بندیزونو له امله زیانمن شوی وو خو له دې ټولو ننګونو سره سره هم د افغانستان بانکي سکتور په ښه توګه مدیریت شوی دی او په ټولیزه توګه بانکونو د پانګې تناسب کافي پیاوړی ساتلی دی.
نوموړي زیاته کړه، چې د افغانستان بانک د صعب الحصول پورونو د بیرته ترلاسه کولو په برخه کې د یوې ځانګړې کمیټې د جوړولو له لارې د بانکونو ملاتړ وکړ، چې په پایله کې یې د بانکونو ګټه لوړه شوه.
د افغانستان لپاره د ملګرو ملتونو سازمان د سرمنشي ځانګړې استازې په خپلو خبرو کې د افغانۍ ثبات ته په اشارې سره وویل چې د نړۍ د ډېری هېوادونو د پولي واحدونو په پرتله د افغانۍ ارزښت حیرانوونکی پرمختګ درلودلی دی او د نړۍ غوره ثبات لرونکو پولي واحدونو څخه ګڼل کېږي.
نوموړې همدارنګه د بانکي سکتور او د کوچنیو تشبثاتو اسلامي مالي تمویل سکتور د ودې په برخه کې د همکارۍ ډاډ ورکړ.