تاند: ( یکشنبه، د سرطان ۲۵ مه) د پاکستان د ولسي جرګې د بهرنیو اړیکو کمیټې رئیس او د جمهوري غورځنګ ګوند مشر محسن داوړ افغانانو ته د پاکستان د ویزو په ورکولو کې د روڼتیا په نشتوالي او د فساد په موجودیت نیوکې وکړې.
نوموړي د پارلمان په عمومي غونډه کې وویل: افغانانو ته د ویزو ورکول یوه جدي مسله ده چې باید د لومړیتوب په اساس ورته رسیدګي وشي.
هغه د پاکستان له بهرنیو چارو وزارت او نورو مسوولو ادارو وغوښتل، چې په تېرو دوو کلونو کې افغانانو ته د ویزو ورکولو د بهیر په اړه راپور ورکړي.
داوړ زیاته کړه: په دې برخه کې هرډول نور ځنډ به دغه کمیټه دې ته اړ کړي چې د بهرنیو چارو وزارتونه او د کورنیو چارو وزارتونه او د تحقیقاتو د فدرالي ادارې په وړاندې جدي اقدام وکړي.
راپورونه وایي، چې افغانانو ته د پاکستان د ویزو ورکولو بیه په تور بازار کې له پینځو سوو تر یو نیم زر امریکایي ډالرو رسیدلې، چې ډېرې ستونزې یې ولاړې کړي.