تاند: ( جمعه، د سرطان ۲۳ مه) د کډوالو په چارو کې د ملګرو ملتونو عالي کمېشنرۍ (UNHCR) اعلان کړی، چې په نړۍ کې شاوخوا ۹،۲ میلیونه افغانان بې ځایه شوي، چې له دې ډلې شاوخوا ۵،۶ میلیونه یې د کډوالو په شان وضعیت کې دي.
د ملګرو ملتونو د راپور له مخې، په افغانستان کې دننه هم له ۳.۲۵ میلیونو ډېر خلک له خپلو اصلي سیمو بې ځایه شوي دي.
که څه هم ملګرو ملتونو د افغانانو د بې ځایه کېدو لاملونه نه دی ویلی، خو جګړه، بېکاري، ښه ژوند ته نه لاسرسی او د طالبانو له غچ اخیستو تېښته په ټوله کې له هېواده د افغانانو د وتو اصلي لاملونه یاد شوي.
د شمېرو له مخې، له وروستیو پېښو وروسته ډېری افغان اتباع ایران او پاکستان ته تللي دي.
د طالبانو رژیم بیا لویدیزوال تورنوي، چې د افغانستان د اقتصادي وضعیت په اړه بې ځایه تبلیغات کوي او خلک هېواد پریښودو ته هڅوي.
دا په داسې حال کې ده، چې خلک ورځ تر بلې د اقتصادي او نورو ننګونو له زیاتیدو شکایت کوي او وایي په افغانستان کې ژوند د اقتصادي ننګونو ترڅنګ د طالبانو د افراطي قیوداتو له امله ورته ستونزمن شوی.