تاند: ( پنجشنبه، د سرطان ۲۲ مه) د ایران د کورنیو چارو وزیر احمد وحیدي وایي، د افغان کډوالو موجودیت د ایران لپاره امنیتي ننګونه نه ده.
هغه دا څرګندونې په دې اړه د څرګندو شویو اندیښنو په غبرګون کې کړي او ویلي، چې د افغان کډوالو له امله د امنیتي ننګونو د پېښیدو استخباراتي راپورونه نه لري.
د ایران د کورنیو چارو وزیر د افغان کډوالو د شمیر په اړه وویل: موږ دقیقې شمېرې نه شو ښودلی، خو د اټکل له مخې په ایران کې د افغان کډوالو شمیر له پنځو میلیونو څخه زیات دی.
تر دې وړاندې یو شمېر ایراني رسنیو په ایران کې د افغان کډوالو شمېر “اته میلیونه” او د هغوی موجودیت د ایران لپاره “لوی امنیتي ننګونه” بللې وه.
له دې سره، له ایران څخه د افغان کډوالو د جبري شړلو او ورسره د ناوړه چلند په اړه راپورونه دوام لري.
د بشري حقونو مدافع بنسټونه د ایران دا چلند غندي، خو د طالبانو رژیم په دې اړه څه نه وایي.
د طالبانو منتقدان ادعا لري، چې دوی ایران سره په همغږۍ، هېواد ته د افغان کډوالو د جبري ستنیدو پلوي دي.