تاند: ( پنجشنبه، د سرطان ۱۵ مه) په کابل او ولایتونو کې د ښځینه سینګارتونونو د تړلو په اړه د طالبانو د مشر ملا هبت الله پریکړه توندو غبرګونونو سره مخ شوې ده.
د بښنې نړیوال سازمان دا پریکړه جنسیتي تبعیض او جنایت ته ورته بللې او د ژر لغوه کیدو غوښتنه یې کړې ده.
د افغان ښځو لپاره د امریکا ځانګړې استازې رینا امیري ویلي، چې طالبان په داسې پریکړو افغانستان په یوې ډېرې بې رحمې او منزوي سیمې بدلوي.
د طالبانو امربالمعروف وزارت، چې دغه پریکړه عملي کوي، وایي د پریکړې دلیل به له عملي کیدو وروسته یې روښانه کړي.
یو شمېر ښځینه سینګار کوونکو ویلي، چې دا کار یې د کورنۍ د نفقې یوازینۍ وسیله وه او نه پوهیږي د کورنۍ د سرپرستۍ مسوولیت به له دې وروسته څنګه ترسره کوي.