تاند: ( پنجشنبه، د سرطان ۱۵ مه) د ملګرو ملتونو په یوه راپور کې، چې د دغه سازمان د سرمنشي انټونیو ګوټېرېش نقل قول هم پکې کارول شوی، د طالبانو رژیم او د دوی یوه وسله واله مخالفه ډله( مقاومت جبهه) په جګړه کې له ماشومانو په استفادې تورن شوي.
په دغه راپور کې، ملګرو ملتونو د افغانستان په ګډون په د نړۍ په ځینو برخو کې د ماشومانو وضعیت مخ په خرابېدو ښودل شوی او اندیښنه پرې څرګنده شوې ده.
سرچینه زیاتوي:(( په کانګو جمهوریت، اسراییل او فلسطین، سومالیا، سوریه، اوکرایین، افغانستان او یمن کې د ماشومانو وضعیت د اندېښنې وړ بللی او په دغو هېوادونو کې یې د وسله والو شخړو پر مهال د ماشومانو پر ګمارنې او له هغوی سره د تاوتریخوالي پېښې ثبت کړې دي.))
په دې راپور کې د ملګرو ملتونو د سرمنشي انټونیو ګوټېرېش له قوله ویل شوي: “په افغانستان کې د ماشومانو د ګمارنې او له هغوی سره د تاوتریخجن چلند ۱۷۹۷ پېښې ثبت شوي.”
د راپور له مخې، طالبانو په تېرو کلونو کې ۴۹۴ ماشومان د جګرې لپاره ګمارلي او په ۲۰۲۲م کال کې یې ۶۹ هلکان له ملي مقاومت جبهې سره د تړاو په تور نیولي. له دغو کسانو، تراوسه ۲۹ تنه بېرته خوشې شوي او ۲ نور یې د طالبانو په توقیف کې مړه شوي.
ملګرو ملتونو راپور همدارنګه ملي مقاومت جبهه هم په جګړه کې د ۱۵ ماشومانو په استخدام تورنه کړې ده.
طالبانو او مقاومت جبهې د ملګرو ملتونو دغه راپور ته غبرګون نه دی ښودلی.
طالبانو مخکې داسې راپورونه تل رد کړي، خو مقاومت جبهې له ملګرو ملتونو او نورو نړیوالو سازمانونو بیا- بیا غوښتي، چې د افغانستان د بشري وضعیت او د طالبانو د ادعا شویو بشري سرغړونو د ښې څارنې لپاره له نیږدې کار وکړي.