تاند: ( شنبه، د سرطان لسمه) د پاکستان پخواني لومړي وزیر او د تحریک انصاف ګوند مشر عمران خان له تحریک طالبان پاکستان سره د سولې د بهیر د بیا پیلولو پر اړتیا ټینګار کړی او ویلي یې دي چې د تحریک طالبان پاکستان غړي باید د خبرو له لارې په پاکستان کې عادي ژوند ته ستانه شي.
نوموړي څرګنده کړه، چې کابل کې د طالبانو رژيم غواړي د ټي ټي پي غړي پاکستان ته وسپاري او خپلو سیمو ته یې ستانه کړي، خو په وینا یې د پاکستان حکومت دغه کار نه مني.
د پاکستان پخواني لومړي وزیر له TTP سره د سولې د خبرو په اړه د خپل پرزول شوي حکومت د دریځ په دفاع کې زیاته کړه: افغانستان وايي چې موږ دوی (دلته) نه غواړو، دوی ستاسو خلک دي او باید بیرته راشي. تاسو ګورئ ، هوښیار کار دا و چې دوی یې ځای په ځای کړي. دوی بیرته عادي ژوند ته راوګرځوئ. دا په ټوله نړۍ کې پیښیږي. هرکله چې د ترهګرۍ پر ضد جګړه پای ته رسیږي، خبرې اترې او جوړجاړی کیږي.
عمران خان دا هم وویل چې د ټي ټي پي مسله د اسلام آباد د غلطې بهرنۍ تګلارې پایله ده او څرګنده یې کړه: ما تل ویلي چې که موږ بې طرفه واسو، که په جګړه کې برخه نه واخلو، نو د وسله والو یاغیانو د کنټرول لپاره به ډېر فرصتونه ولرو. خو کله چې موږ په یوه لوري ولاړ شو، نو دوی پر پاکستان بریدونه پیل کړل او دلته تحریک طالبان رامنځته شول. اوس دوی پاکستان ته وايي چې ته د امریکا پلوي یې او له همدې امله بریدونه کوي.
د تحریک انصاف ګوند مشر پر دې له ټینګار سره چې پاکستان تل د نورو قدرتونو له خوا ناوړه ګټه پورته کړې ده، زیاته کړه: “کله چې امریکا موږ ته اړتیا لري، له موږ څخه کار اخلي، هغوی هم د افغان جهاد پر مهال له موږ څخه کار اخیستی دی.” له هغې وروسته، دوی موږ د کاغذ تولیدو په څیر لرې کړل. د ترهګرۍ ضد جګړه کې هم له موږ څخه کار واخیستل شو او بیا ختم شو او له پامه غورځول شو. دا زموږ خپله ګناه ده. موږ یوې ځانګړې بهرنۍ ستراتیژۍ ته اړتیا لرو.
د پاکستان حکومت د عمران خان څرګندونو ته غبرګون نه دی ښودلی، خو مخکې یې نوموړی د پاکستاني طالبانو په پياوړي کولو تورن کړی او ویلي و، چې له دغې ډلې سره د عمران خان د سولې خبرو پاکستاني طالبان زړه ور او پياوړي کړي وو.