تاند:( جمعه ، د جوزا ۱۹ مه ) په افغانستان کې د ملګروملتو ځانګړې استازې رزوا اوتنبایوا دا ځل د طالبانو د تر ټولو افراطي دستګاه( امر بالمعروف، نهې عن المنکر او شکایتونو اوریدو وزارت) څخه وغوښتل چې په دولتي ادارو کې د ښځو د کار کولو پر وړاندې خنډ کیدل پای ته ورسوي.
نوموړې د یاد شوي وزارت له مسلکي مرستیال شیخ محمد فقیر سره په کتنه کې په دولتي ادارو کې د ښځو د کار بندیز ته په اشارې وویل چې دې ستونزې ته باید مناسبه حللار ولټول شي.
د باختر اژانس پر اساس، د طالبانو د امربالمعروف وزارت مسلکي مرستیال د اغلې اوتنبایوا د غوښتنې په ځواب کې وویل چې د خپل هیواد د کلتور او قوانینو په رڼا کې هڅه کوي چې اسانتیاوې رامنځته کړي.
یوناما د طالبانو د امربالمعروف وزارت له چارواکي سره د افغانستان لپاره د ملګروملتو د سرمنشي د ځانګړې استازې د خبرو په اړه څه نه دي ویلي.
د طالبانو امربالمعروف دستګاه، چې د جمهوري نظام د ښځو چارو وزارت په ودانۍ کې، د هغه وزارت له لغوه کیدو وروسته رامنځته شوه، د یاد شوي وزارت ټولې ولایتي ادارې او امکانات یې په واک کې نیولي او د ښځو د فعالانو په وینا، د ښځو پر خلاف یې کاروي.
پر دغې دستګاه د ښځو خلاف د افراطي پریکړو د وضع کولو له اړخه توندې نیوکې کیږي.
د طالبانو رژیم، خپلې دغې ادارې ته تر بلې هرې ادارې زیات صلاحیتونه ورکړي.
دا څومره د خواشینې ځاې دي چې، بهرنیان افغان میرمنو ته د انساني ژوند، مساواتو، د ژوندي پاتي کیدو او کار حق غوښتنه کوي.
آيا دا خلک منطق لري؟