تاند:( جمعه ، د جوزا ۱۹ مه ) د افغانستان په ګډون یو شمېر هېوادونو د سیمه ییزې سوداګرۍ د اسانتیا زیاتولو په اړه نوې هوکړه کړې، چې پاکستان یې هرکلی کړی.
د افغانستان- پاکستان د صنعت او سوداګرۍ د ګډې خونې ريیس زبیر متولي (متولا) ویلي، چې له افغانستان، روسیې او ایران سره د بارتري سوداګرۍ د پیلولو لپاره د پاکستان د حکومت د نوښت هرکلی کوي.
پاکستاني رسنیو د متولي په قول وویل چې دوی له ۲۰۲۱ څخه هڅه کوي چې د سیمې د هیوادونو په تېره بیا د افغانستان او پاکستان ترمنځ د سوداګري اړیکو د پراختیا له لارې خنډونه لېرې شي.
ده د څلور هیوادونو ترمنځ د بارتري یا جنس په جنس سوداګرۍ د میکانیزم پر سر موافقه د سوداګرۍ د غودېدو لور ته یو مهم ګام وباله.
پاکستاني رسنیو دا موافقه د پاکستان لپاره چې له ژور افتصادي بحران او د اسعارو له کموالي سره مخامخ دی، مرستندویه بللې ده.
د موافقې پر اساس، پاکستان به افغانستان، روسیې او ایران ته ۲۶ قلمه سوداګري مال ورکوي او په مقابل کې به یې له دغو هیوادونو د ګاز، پیترولو او سکرو په شمول بیلابیل شیان، چې پاکستان ورته اړتیا لري، واردوي.
پاکستان په وروستیو کې سخت اقتصادي ناورین سره مخامخ دی، چې د شنونکو په باور له داسې سوداګریزو تړونونو تر هر چا زیاته ګټه وړي.