تاند:( جمعه ، د جوزا ۱۹ مه ) تر هغې وروسته، چې د بریتانیا یوې موسسې په افغانستان کې د نیشه یي توکیو د کښت کمیدو خبر ورکړ، د طالبانو رژیم د نیشه یي توکیو د له منځه وړلو له امله زیانمنو افغان کروندګرو سره د نړیوالو مرستو غوښتنه وکړه.
د طالبانو د رژیم مرستیال ویاند بلال کریمي وایي، دوی د اقتصادي ستونزو له کبله په هغو سیمو کې چې د کوکنارو مخه نیول شوې، لویې پروژې اجرا کولی نه شي نو له نړیوالې ټولنې غواړي چې له کروندګرو سره د مرستې لپاره د متبادلو کارونو په برخه کې مرسته وکړي.
د یوې بریتانیايي موسسې د سروې پر اساس، سږ کال په افغانستان کې په تېرو ۲۰ کلونو کې تر ټولو لږ کوکنار کرل شوي دي.
السیس موسسې ویلي چې د سپوږمکۍ په وسیله اخیستو تصویرونو ورته څرګنده کړې چې تر هغه څه چې اټکل یې کاوه د کوکنارو د کښت مخه زیاته نیول شوې ده.
د افغانستان لپاره د امریکا ځانګړی استازی ټوماس وېسټ وايي، د کوکنار او تریاکو په تولید کې د پام وړ کمښت په برخه کې د طالبانو د تګلارو په اړه راپورونه د اعتبار وړ او مهم دي.
هغه پر خپل تویټر لیکلي: “هغه راپورونه چې طالبانو داسې تګلارې پلي کړي چې سږ کال یې د کوکنار تاریاکو په تولید کې د پام وړ کمښت راوړی، د اعتبار وړ او مهم دي. هر هېواد، په سیمه او بهر کې، له نشه یي توکو پاک افغانستان کې ګډې ګټې لري.”
طالبانو ویلي، چې په ټول افغانستان کې یې د نیشه یي توکیو د کښت مخنیوی کړی او په بدل کې یې باید کروندګرو سره مرستې وشي.
د طالبانو د کورنیو چارو وزیر سراج الدین حقاني څه موده مخکې په دې برخه کې افغانستان سره د لږتر لږه دوه میلیارده ډالرو مرستې غوښتنه کړې وه.
هغه کروندګر چی کوکنار کری هغوی عادی کروندګر ندی د هغو شاته هرومرو یو لوی ځناور ولاړ دې نو ستاسو خو له کفر سره دشمنی لری او د اسلام نه منی نو په خپله ورسره مرسته وکړی له کفارو مرسته مه غواړی