تاند:( جمعه ، د جوزا ۱۹ مه ) د افغانستان لپاره د ملګروملتو د سرمنشي د ځانګړي استازي مرستیال زامرالاکبراوف په افغانستان کې خپل درې کلن ماموریت په دغه هېواد کې د مساوات د تامینیدو له هیلې سره پای ته ورساوه.
نوموړي په یوه ټویټ کې، د افغانانو د ملاتړ لپاره د مرستندویو ټولنو او د بشري مرستو د موسسو مننه کړې او ویلي: په دې هیله یوناما سره خدای پاماني کوي چې په افغانستان کې داسې جنسیتي مساوات، ټولنیز او اقتصادي فرصتونه رامنځته شي چې د ۴۰ میلیونه افغانانو د سوکالۍ او ثبات سبب شي.
رامزالاکبراوف د ۲۰۲۰ په دسمبر کې په افغانستان کې د ملګروملتو د سرمنشي د ځانګړي استازي مرستیال ګومارل شوی و.
دغه نړیوال دیپلومات په داسې مهال له افغانستان سره مخه ښه کوي، چې یوناما او کارکوونکي یې له طالب رژیم سره د تعامل له هڅو ناراضه بریښي.
یوناما بیا- بیا تورنه شوې، چې د طالبانو په ګټه کار کوي، خو د دغې ادارې استدلال دا دی، چې د طالب له واکمنۍ سره بیا هم افغانستان نړیوالو مرستو ته اړتیا لري او نه باید خلک یې په بد اقتصادي او بشري وضعیت کې یوازې پریښودل شي.
د طالبانو په بیا واکمنیدو، افغانستان په ډېرو لحاظونو، په خاص ډول د ښځینه وو د حقونو د پراخ نقض له امله ډېر ځپل شوی او طالبان له دې امله توندو نیوکو سره مخ دي.