تاند:( جمعه ، د غویي ۲۹ ) د قطر لومړي وزیر او د بهرنیو چارو وزیر محمد بن عبدالرحمن آل ثاني او د جرمني د بهرنیو چارو وزیرې انالنا بیربوک د افغانستان په وروستیو سیاسي او امنیتي مسایلو خبرې وکړې.
د قطر د بهرنیو چارو د وزارت له خوا په خپره شوې اعلامیه کې راغلي، محمد بن عبدالرحمن په دې کتنه کې د هر ډول داخلي کړکېچ د مخنیوي لپاره د افغانانو د ظرفیتونو د لوړولو او د هغوی د ځواکمنولو لپاره د نړیوالې ټولنې د دوامدارې همکارۍ پر اړتیا ټینګار وکړ.
اعلامیه زیاتوي چې محمد بن عبدالرحمن همداراز ټینګار وکړ چې په دې برخه کې د نړیوالې ټولنې همکاري د سولې د ټینګښت، د بشري حقونو په ځانګړې توګه د ښځو حقونو ته د درناوي، د نجونو د ښوونې او روزنې او په ټولو برخو کې د پرمختګ لپاره اړینه ده.
قطر په افغانستان کې یو له مهمو لوبغاړو څخه دی او له دغه هېواد څخه د امریکا له وتلو وروسته په افغانستان کې د واشنګټن د ګټو د ساتونکي په توګه نومول شوی و.
د قطر د بهرنیو چارو وزیر په دې وروستیو کې افغانستان ته د سفر په ترڅ کې له لوړ پوړو طالب چارواکو سره کتلي دي. له هغه وروسته یې له خپل امریکايي سیال سره د افغانستان په اړه ټیلیفوني خبرې وکړې.