تاند:( یکشنبه ، د غویي ۲۴ ) د افغانستان لپاره د طالبانو واکمنانو ویلي، چې نن د نړیوالو بشري مرستو یوه بله ۴۰ میلیون ډالري کڅوړه کابل ته رسیدلې.
تېره چار شنبه هم د نقدي پیسو یوه ورته کڅوړه کابل ته رسیدلې وه.
طالبان وایي دا پیسې د ملګرو ملتونو اړوندو مرستندویو موسسو ته ورکول کیږي، چې پر بشري مرستو یې ولګوي.
د دوی له بیا واکمنیدو سره تر اوسه کابل ته نیږدې دوه میلیارده ډالره په ورته کڅوړو کې لیږدول شوي.
د طالبانو منتقدین دا پیسې دغې ډلې ته د خپل واک د دوام لپاره د نړیوالو او په ځانګړي ډول امریکا متحده ایالاتو د نامستقیمو مرستو نوم ورکوي، خو طالبان وایي دا پیسې دوی نه؛ نړیوالې موسسې لګوي.
نن په افغانستان کې د خوړو د نړیوال پروګرام مشرې هیو وی لی د دغه هېواد د بشري وضعیت په اړه خپله اندیښنه څرګنده او اعلان وکړ چې شل میلیونه افغانان هره ورځ د خوړو لپاره کافي خواړه نه لري او وږي ویدیږي.