تاند:( شنبه ، د غویي ۲۳ )  په واشنګټن کې د پاکستان پخواني سفیر حسین حقاني د دغه هېواد په چارو کې د زلمي خلیلزاد د زیاتېدونکو څرګندونو پر ضد غبرګون ښودلی او ویلي یې دي چې د هغه هېواد په سیاست کې باید دومره لاسوهنه ونه کړئ چې تاسو ورسره تړاو نه لرئ.

حقاني د زلمي خلیلزاد هغو څرګندونو ته غبرګون وښود چې د پاکستان د پوځ د لوی درستیز د استعفا غوښتنه یې کړې وه.

حقاني په ټویټر کې لیکلي: “هیڅوک باید د هغه هېواد په سیاست کې تر دې حده مداخله ونه کړي چې د هغه هېواد تبع نه وي.”

حقاني چې د ۲۰۰۸ او ۲۰۱۱ کلونو ترمنځ په واشنګټن کې د پاکستان سفیر و، خلیلزاد ته په طنزیه بڼه لیکلي وو: «ما کولای شوای چې له زلمي خلیلزاد څخه یې د استعفا غوښتنه کړې وای، خو له نېکه مرغه چې د استعفا لپاره هیڅ موقف نه لري.»

خلیلزاد په خپله ټویټر پاڼه کې د پاکستان د وروستیو پرمختګونو او د پاکستان د پخواني لومړي وزیر عمران خان د نیولو په اړه لیکلي چې د پاکستان د پوځ لوی درستیز باید نوی او له سیاسي پلوه بې پرې کس وي. نوموړي له جنرال عاصم منير څخه وغوښتل چې وطن دوسته شي او استعفا ورکړي.

په افغانستان کې د امریکا پخواني استازي خبرداری ورکړی، چې که جنرال منیر استعفا ونه کړي او د ټاکنو نېټه ونه ټاکل شي، د پاکستان اقتصادي، سیاسي او امنیتي کړکېچ به لا پسې خراب شي.

نوموړي د پاکستان په سیاسي چارو کې په ښکاره لاسوهنه کې لیکلي، چې جنرال منیر د پاکستان د پوځ او خلکو ترمنځ واټن رامنځته کړی او د پاکستان ډېر لوړ پوړي چارواکي ترې ناراضه دي.

هغه زياته کړه چې جنرال منير د شهباز شريف ډېر فرمانبردار او اطاعت کوونکى دى او په دې وروستيو ورځو کې د هغه پرېکړې د پوځ يو شمېر لوړ پوړو افسرانو له خپلو دندو استعفا کړې ده.

تر دې مخکې د عمران خان له نیول کېدو وروسته خلیلزاد په زندان کې د هغه د مرګ د احتمال خبرداری ورکړی و.