تاند:( پنجشنبه ، د غویي ۲۱ ) په افغانستان کې د چين سفارت وايي هغه افغانان، چې غواړي چين ته سفر وکړي، د ویزې غوښتنلیک دې له کوم فیس جمع کولو پرته په انلاین ډول د سفارت په وېب پاڼه کې ډک کړي.
دغه سفارت په یوه اعلامیه کې ویلي، وېزه اخيستونکي اړ نه دي، چې د فورم د ډکولو، ملاقات او يا وېزو اخيستلو لپاره کوم درېيمګړي ته پيسې ورکړي.
په اعلامیه کې راغلي، چې سفارت به هېڅکله د وېزې د ټاکلو وخت لغوه نه کړي او نه هم کومې منځګړې ادارې ته اجازه ورکوي، چې د وېزې غوښتونکو سره د وېزې د غوښتنليکونو په ډکولو، آنلاين ملاقاتونو ترلاسه کولو يا سفارت ته د اسنادو په سپارلو کې مرسته وکړي.
سرچینه زیاتوي:(( نو د دې لپاره چې له چل او فريب څخه مخنيوی وشي، سپارښتنه کېږي، چې د وېزې غوښتونکي په سمه توګه د غوښتنليک فورمه ډکه کړي، آنلاين د ملاقات وخت وټاکي او د ((چين وېزې غوښتنليک لپاره له لارښوونې)) سره سم اړين اسناد وسپاري.))
دا په داسې حال کې ده، چې د طالبانو له بیا واکمنیدو سره د پاکستان او ایران په ګډون د نړۍ نیږدې ټولو هېوادونو ته د افغانانو د تلو ویزې اخیستل په بېساري ډول ستونزمن شوي او دغه ویزې تر ډېره په تور بازار کې په ډېره لوړه بیه پلورل کیږي.
د چین په شان ژمنې د نورو هېوادونو سفارتونو هم کړي، چې خلک یې عملي اړخ ډېر کم رنګه بولي.