تاند:( شنبه ، د غویي ۱۶ ) د پاکستان، چین او طالبانو د بهرنیو چارو وزیرانو درې اړخیزه ناسته نن په اسلام اباد کې ترسره شوه.
د راپورونو له مخې، په دغې ناسته کې د افغانستان د امنیتي وضعیت د ښه کیدو او د اقتصادي ثبات پر ټینګښت تمرکز وشو.
د چین د بهرنیو چارو وزیر ګانګ ویلي، اسلام اباد او پیکنګ چمتو دي د افغانستان د اقتصاد په بیا رغونه کې مرسته وکړي.
هغه خبریالانو ته وویل، هیله من دی چې طالبان ټول شموله حکومت جوړ او د معتدل سیاست په پلي کولو سره ګانډیو هیوادونو سره ښې اړیکې وساتي.
د طالبانو د بهرنیو چارو سرپرست وزیر مولوي امیرخان متقي تیره ورځ د یوه پلاوي په مشرۍ اسلام اباد ته رسیدلی.
تمه کیږي، چې متقي او طالب پلاوی له پاکستاني چارواکو سره نورې ناستې او خبرې هم ولري.