تاند:( شنبه ، د غویي ۱۶ ) د پاکستان د بهرنیو چارو وزیر بلاول بوټو زرداري د شانګهای د همکارۍ سازمان د بهرنیو چارو د وزیرانو په شورا کې په خپله وینا کې د افغانستان وضعیت ته په اشارې سره له دغه هېواد سره د نړیوالې ټولنې د تماسونو دوام د ارزښت وړ وباله.
زرداري وویل: د افغانستان وضعیت د نویو فرصتونو تر څنګ ننګونې هم راوړي. موږ په نړیواله ټولنه هم غږ کوو چې د افغانستان حاکم رژیم سره په ماناداره توګه تعامل وکړي.
د پاکستان د بهرنیو چارو وزیر زیاته کړه: له دې وروسته چې افغانستان په ځلونو د سترو قدرتونو د لوبې ډګر ګرځیدلی دی، مونږ د افغانستان له خلکو سره د پخوانیو تېروتنو په نه تکرارولو مکلف یوو. یوه متحده نړیواله ټولنه باید دې غوښتنې ته ادامه ورکړي چې اوسني چارواکي د سیاسي شمولیت نړیوال منل شوي اصول پلي کړي او د نجونو د زده کړې حق په ګډون د ټولو افغانانو حقونو ته درناوی وکړي.
هغه زیاته کړه: نړیواله ټولنه هم باید په ټولیزه توګه د افغانستان، سیمې او نړۍ د امنیت لپاره له ترهګرۍ سره د مبارزې د ظرفیت په لوړولو کې مرسته وکړي. دا د اندیښنې وړ ده چې په افغانستان کې ترهګرې ډلې د نړیوالې ټولنې په پرتله له یو بل سره ډېره همکاري لري.
زرداري یو ځل بیا ادعا وکړه، چې په افغانستان کې د ناامنيو د رامنځته کيدو له پایلو تر هر چا ډېر پاکستان زیات زیانمنیږي. هغه د افغانستان له واکمنې ادارې وغوښتل چې د افغانستان له خاورې د تروريزم لپاره د کارونې اجازه ورنه کړي.
نوموړي د دې په څرګندولو سره چې نړيواله ټولنه بايد د امنيتي اندېښنو د له منځه وړلو لپاره کار وکړي، زياته کړه: يو سوله ييز او باثباته افغانستان نه يوازې د سيمه ييزې انسجام او اقتصادي همکارۍ، بلکې د نړيوالې سولې او ثبات لپاره هم مهم دى. موږ باور لرو چې د شانګهای همکارۍ سازمان-افغانستان تماس ډله کولی شي له افغانستان سره د عملي همکاریو په همغږۍ کې رول ولوبوي.
طالبانو د زرداري څرګندونو ته غبرګون نه دی ښودلی، خو مخکې یې په افغانستان کې د ترهګرو ډلو موجودیت رد کړی.