تاند:( چار شنبه ، د غویي ۱۳ ) د پکتيا ولايت په احمد آبا، ميرزکې، اريوب ځاځي، احمد خېلو او څمکنيو ولسواليو کې د نږدې ۶ ميليونو افغانيو په لګښت د اوبو شپږ شبکې جوړېږي.
د طالبانو د رژیم ځایي چارواکو ویلي، چې د دغو پروژو له بشپړیدو سره به ۱۹۱۰ کورنيو ته د څښاک اوبه برابرې شي.
د يادو ولسواليو اوسېدونکي وايي، په زياتره سيمو کې خلک د څښاک د پاکو اوبو نشتون له امله له ککړې اوبو استفاده کوي او د څښلو پرمهال يې خلک په بېلابېلو ناروغيو اخته شوي دي.
طالبانو د یادو پروژو د تمویل سرچینې نه دي په ډاګه کړي، خو په افغانستان کې د زیاتو داسې پروژو تمویلونکی د ملګرو ملتونو یونیسف اداره ښودل کیږي.
د يادونې وړ ده، چې د هيواد ډېري سيمې په تېرو څو کلونو کې وچکاليو سختې ځپلې دي او د کرکيلې د پيکه کېدو تر څنګ يې د څښاک اوبو ته لاسرسي هم ستونزمن کړي دي.