تاند:( چار شنبه ، د غویي ۱۳ ) د عامې روغتيا وزارت لپاره د طالبانو په هلمند کې د ۱۰ نويو روغتيايي مرکزونو د پرانيستلو خبر ورکړی دی.
دغه وزارت په يوه خبرپاڼه کې ويلي، چې د دغه وزارت لپاره د طالبانو د رژیم مالي او اداري مرستيال، مولوي محمد اسحق صاحبزاده هلمند ته د خپل سفر په ترڅ کې په دې ولايت کې د لسو نويو روغتيايي مرکزونو پرانيسته ترسره کړه.
په خبرپاڼه کې راغلي، چې مالي او اداري مرستيال د دې روغتيايي مرکزونو د پرانيستلو مراسمو ته په وينا کې ويلي، چې د دې مرکزونو په پرانيستو سره به هلمند کې د ولسونو روغتيايي ستونزې حل او دوي به له معياري روغتيايي خدمتونو څخه برخمن شي.
طالبانو نه دي ویلي، چې دغه روغتیایي مرکزونه د جمهوري نظام له وخته د جوړیدو په حال کې وو، كه اوس جوړ شوي او څومره لګښت پرې شوی؟