تاند(پنجشنبه، د حمل ۲۲مه) د افغانستان پخواني ولسمشر اشرف غني دا ځل د کوچني اختر په مناسبت په خپل پیغام کې د طالبانو پر حکومت توندې نیوکې کړي او هغه یې د خفیه سازمان له خوا تر پټ مخې مشرتابه لاندې پټه واکمني بللې ده.

اشرف غني تور لګولی چې طالبانو افغانستان په شدت په سیمه کې د سپکاوي، نړیوالې انزوا او ملي ګډوډۍ لور ته روان کړی دی.

ده همداراز ویلي:«افغانستان په تاریخي لحاظ خپل قوت د خپلو قومونو او ژبو له رنګارنګۍ تر لاسه کړی دی. په تېرو زرو کلونو کې، جلا جلا قومونو په دې خاوره حاکمیت کړی او نور ولس ورسره د ګډ افغان وطن په لمن کې یو ځای شوی دی. اوس دغه لرغوني تاریخ ته له پام پرته له بېلابېلو خواوو، زموږ مشترک ملي هویت تر حملې لاندې دی. په دې برخه کې، حاکمه ډله تر نورو ډېر زیان پېښوي. دوی هر هغه څه چې زموږ ګډ ملي افتخارات دي، له منځه وړي. د دوی هڅې چې په اشتباه پښتنو ته منسوبېږي، په دغه قوم هیڅ اړه نه لري. دوی یوازې پښتو وایي، خو پښتو نه کوي. پښتو کول یې زده نه دي. دوی حتی د نجونو د زده کړو او کار مساله کې په پښتنو او نورو قومونو تهمت وایي چې ګویا دا بندیز د هغوی د کلتوري ارزښت له مخې لګېدلی دی. خفیه سازمان په حقیقت کې له ټولو ملي ارزښتونو سره د ضدیت تکلاره غوره کړې او »نه منم« یې په خپل رسمي سیاست اړولی دی. »

پخواني ولسمشر په خپل اختري پیغام کې د افغانستان پر بشري وضغیت هم اندېښنه ښوولې او ویلي چې تراوسه پورې یوازې بشري مرستو د بشپړ بشري بحران مخه نیولې ده خو تاریخ شاهدی دی چې هیڅ ملت په سوال نه دی پایېدلی.

ده طالبان یو جابر اقلیت بللی او ټینګار یې کړی چې ټول ظالمان په یوه قومي اقلیت پورې تړاو لري چې هغه استبداد دی:« هماغسې چې جنگسالاران زموږ د سترو قومونو – تاجکانو، هزاره ګانو، ازبکانو، ترکمنانو، بلوڅانو، نورستانیانو، پشه یانو او نورو نمایندګی نه شي کولی، طالبان هم هیڅکله د پښتنو استازي نه وو او نه دي. د دوی دواړو عملونو، افغانان له عدالته محروم کړي دي.»

اشرف غني په عین حال کې طالبانو ته سپارښتنه کړې چې له انحصاره لاس واخلي او مخکې تر دې چې فرصت له لاسه ووځي داسې سولې ته غاړه کښېږدي چې د عدالت او مساوات پر اساس وي.