تاند:( سې شنبه ، د حمل ۲۹ ) له کاپېسا څخه راپورونه څرګندوي، چې د طالبانو له لوري د تېرې اونۍ جګړه کې د دوی د وژل شوي یوه مخالف قومندان اکمل امیري جسد د دوشنبې پر ورځ خاورو ته سپارل شوی.
د نوموړي یو شمېر خپلوانو ادعا کړې، چې طالبانو د هغه جسد په ډېر ځنډ، هغه هم په دې شرط دوی ته سپارلی و، چې په جنازه کې به یې ګڼه ګوڼه نه وي.
په ځینو راپورونو کې خو ان د نوموړي د جنازې لمانځه د ممانعت ادعا هم شوې.
طالبانو په دې اړه څه نه دي ویلي.
خپرو شویو ادعاوو ته په ټولنیزو رسنیو کې یو شمېر افغانانو او د طالبانو منتقدانو توند غبرګونونه ښودلي او طالبان یې د بشري او اسلامي اصولو په نقض تورن کړي.
اکمل امیري د افغانستان د جمهوري نظام د کومانډو ځواکونو له مشهورو سرتېرو څخه و، چې د نظام له سقوط وروسته یې د خپلواکۍ جبهې په نوم د طالبانو خلاف په یوه جنګي ډله کې ځان شامل او په شمالي ولایتونو کې د طالبانو پر ضد فعالیت درلود.
طالبانو تېره اونۍ وویل، چې نوموړی یې په جنوبي سالنګ کې د عملیاتو پر مهال له ۷ ملګرو سره یې وژلی.
خپلواکۍ جبهې بیا ویلي وو، چې هغه او ملګري یې د سختې جګړې پر مهال وژل شوي.
اکمل امیري، له دې امله چې د جمهوري نظام پر مهال یې د طالبانو خلاف مشهورو عملیاتو کې ګډون کړی و او د دوی پر ضد یې د ویناوو ویډيوګانې موجودې دي، وژل کیدل یې ډېر رسنیز شوي او زیاتو خلکو خواشیني پرې څرګنده کړې ده.
طالب پلوو بیا ویلي، چې هغه او وسله والو ملګرو یې خپله د جګړې لاره غوره کړې وه.
مزاحمت ندۍ شوۍ صرف پته یې غلطه وه.
ریښتیا پته د مځکې پر مخ نوه، ګنی تاسو یې خپله په ګوګل کې ولټوۍ.
کولاب خراسان