تاند:( یکشنبه ، د حمل ۲۷ ) هندي چارواکو د خوړو نړیوال سازمان سره د ۱۰ زره ټنه غنمو د مرستو تړون لاسلیک کړی.
ویل شوي، چې یاد شوي غنم به د هند له لوري دغه سازمان ته ورکول کیږي، چې په افغانستان کې یې پر بېوزلو خلکو ووېشي.
د هندي چارواکو په خبره، دوی به دا غنم د چابهار بندر له لارې افغانستان ته ولیږدوي.
د ملګرو ملتونو د ځینو راپورونو له مخې، په افغانستان کې اړمنو ته د بشري مرستو بودیجه په کمېدو ده.
د هند حکومت تر دې مخکې د اشرجمهوري نظام له ړنګېدو او د بې وزلۍ او بېکارۍ د پراخېدو له امله د یوه بشري ناورین د زیاتېدو د اندېښنو پر مهال افغانستان ته پنځوس زره ټنه غنم ورکړي وو.
د هند حکومت اعلان کړی و، چې پنځوس زره ټنه مرسته شوې غنم به د پاکستان له لارې افغانستان ته ولېږدوي، خو د پاکستان حکومت له څو میاشتو راهیسې افغانستان ته د دې مرستو د لېږد مخه ونیوله او بالاخره له شاوخوا یو کال وروسته د خوړو د نړیوال سازمان په منځګړیتوب د هند حکومت دغه مرسته وکړه.
په ۲۰۲۱ کال کې افغانستان ته د غنمو د بار وړلو په برخه کې له مرستې د پاکستان انکار د دې لامل شو چې دا ځل د هند د مرستو کارګو د ایران د چابهار بندر له لارې ولېږدول شي.
سپوږمۍ رادیو:
د هند د دفاع وزیر راجنات سېنګهـ په نوي ډیلي کې د شانګهای همکاریو سازمان د دفاع وزیرانو غونډې په څنډه کې له ایراني سیال سره کتلي. د دې لېدنې پر مهال په افغانستان کې د سولې او ثبات، د افغانستان او منځنۍ اسیا تر څنګ نورو هېوادونو ته د لوژسټیکي ستونزو د راکمولو په موخه د شمال- سویل نړیوال ټرانسپورټي دهلېز د پراختیا په اړه خبرې شوې دي.